Коммуналдық қызметтер саласы жемқорлықтан азат болуы тиіс

Квазимемлекеттік сектор қызметкерлері арасында сыбайлас жемқорлыққа қарсы мәдениетті қалыптастыру аясында ҚР Сыбайлас жемқорлыққа қарсы іс-қимыл агенттігінің Ақмола облысы бойынша департаменті Көкшетау қаласының әкімдігі жанындағы «Көкшетау Жылу» ШЖҚ МКК еңбек ұжымымен алдын алу кездесуін өткізді.

Кездесу барысында Департаменттің алдын алу және парасаттылық басқармасының басшысы Бақытжан Әмірханов сыбайлас жемқорлық жасағаны үшін қылмыстық және әкімшілік жауапкершілік, сондай-ақ сыбайлас жемқорлыққа қарсы іс-қимыл саласында Департамент жүргізіп жатқан қажетті шаралар туралы кездесуге қатысушыларға ақпарат берді.

Айта кету керек, өткен жылы жылу тарифтерін негізсіз көтеруден көрінген қызметтік өкілеттігін асыра пайдаланғаны үшін «Көкшетау Жылу» бұрынғы бас директоры Сергей Жуков пен оның орынбасары Гаухар Алтынсарина сотталды.

«Тұрғын үй-коммуналдық шаруашылық, соның ішінде, жылумен қамтамасыз ету саласы теріс пиғылды қызметкерлердің түрлі жемқорлық схемаларын жүзеге асыру үшін қолайлы орта екені  барлығына анық. Олар мемлекеттік қызметкер болмаса да көмір, мазут сатып алу үшін мемлекеттік сатып алуды жүргізу кезінде өздерінің лауазымдық өкілеттіктерін асыра пайдаланады. Осы орайда, біз аталған жағдайларды жағдайларды анықтау және жолын кесу бойынша жұмысты жалғастыруды көздеп отырмыз. Алайда, біз үшін сыбайлас жемқорлыққа қарсы күресте алдын алу шараларын жүргізу басты бағыт екендігін атап өту қажет. Сондықтан да, сыбайлас жемқорлық көріністерінің кез келген түріне төзбеушілік танытып, сондай – ақ, өз жұмысыңызды парасатты және адал атқаруға шақырамын», - деп, Бақытжан Әмірханов өз сөзін аяқтады.

Қазақстан Республикасының Сыбайлас жемқорлыққа қарсы іс-қимыл Агенттігінің Ақмола облысы бойынша Департаменті