Бала тәрбиелеу - ата-ананың құқығы және міндеті

Бала тәрбиелеу - бұл ата-ананың құқығы, әрі міндеті.

Ата-аналар өз баласының денсаулығына қамқорлық жасауға, тәрбиелеуге, дене бітімі, психикалық, адамгершілік және рухани дамуына қажеттi өмiр сүру жағдайларын қамтамасыз ету үшін жауаптылықта болады.

Егер бұл міндеттер орындалмаған жағдайда, ата-аналарға қатысты жаза қолданылады.

Өкінішке орай, бұндай ата-аналар санаты да бар, олар үшін ата-ана міндетін орындау үлкен ауыртпалыққа айналды.

Ювеналды полиция қызметкерлерімен азаматша К-ға қатысты кәмелетке толмаған қызын асырап-бағу, тәрбиелеу және оқыту бойынша ата-аналық міндеттерін орындамағаны үшін әкімшілік құқық бұзушылық туралы хаттама толтырылды.

Аталған факт бойынша, кәмелетке толмағандардың істері жөніндегі сотымен ӘҚБтК-нің 127 бабы 2 бөлігімен, яғни ата-ананың немесе басқа да заңды өкiлдердiң кәмелетке толмаған балаларды тәрбиелеу және (немесе) оларға білім беру, олардың құқықтарын және (немесе) мүдделерін қорғау жөнiндегi, сондай-ақ оларға күтім жасау және күтіп-бағу жөнiндегi мiндеттерін әкімшілік жаза қолданылғаннан кейін бір жыл ішінде қайтадан орындамауы  бойынша әкімшілік іс қаралды.

Сот отырысында  азаматша К. өзінің кінәсін толықтай мойындап, бәрін түсінгенін және болашақта бұндай заң бұзушылықтарға жол бермеуге міндеттенді.

Кәмелетке толмағандардың істері жөніндегі мамандандырылған ауданаралық сотының қаулысымен азаматша К. кінәлі деп танылып, оған  

29 169 (жиырма тоғыз мың жүз алпыс тоғыз) теңге көлемінде айыппұл салынды.

 Қаулы заңды күшіне енген жоқ.

БҚО қәмелетке толмағандардың істері жөніндегі

мамандандырылған ауданаралық соты