Заң және тәртіп – қоғам тұрақтылығының негізі
Қоғамның тұрақты дамуы мен азаматтардың қауіпсіз өмір сүруінің басты негіздерінің бірі – заң мен тәртіп. Заң – мемлекет пен қоғам арасындағы қоғамдық қатынастарды реттейтін негізгі құрал болса, тәртіп – заң талаптарының күнделікті өмірде сақталуы мен орындалуын қамтамасыз ететін маңызды қағида.
Құқықтық мемлекетте әрбір азаматтың құқықтары мен бостандықтары заңмен қорғалады. Сонымен қатар әр азамат Конституция мен заңдарда белгіленген міндеттерді орындауға, басқа адамдардың құқықтары мен заңды мүдделерін құрметтеуге тиіс. Заң талаптарының баршаға бірдей болуы – әділетті қоғам қалыптастырудың маңызды шарты.
Заңды сақтау тек мемлекеттік органдардың немесе құқық қорғау органдарының міндеті емес. Бұл – қоғамның әрбір мүшесіне ортақ жауапкершілік. Қарапайым күнделікті әрекеттерден бастап, қоғамдық орындардағы тәртіпті сақтау, жол қозғалысы ережелерін орындау, басқа азаматтардың құқықтарын құрметтеу және өз міндеттеріне жауапкершілікпен қарау – құқықтық мәдениеттің көрінісі.
Мемлекет тарапынан заңдылық пен тәртіпті қамтамасыз ету бағытында жүйелі жұмыстар жүргізілуде. Құқық бұзушылықтардың алдын алу, азаматтардың құқықтық сауаттылығын арттыру, мемлекеттік органдардың ашықтығы мен жауапкершілігін күшейту – осы бағыттағы негізгі міндеттердің бірі.
Әсіресе жас ұрпаққа заңды құрметтеудің маңызын түсіндіру ерекше мәнге ие. Баланың бойында жауапкершілік, әділдік, тәртіп және өзгенің құқықтарына құрмет сезімдерін қалыптастыру арқылы біз болашақта заңды сыйлайтын, қоғам алдындағы жауапкершілігін түсінетін азаматтарды тәрбиелей аламыз.
Заң мен тәртіп орнаған қоғамда азаматтардың мемлекетке деген сенімі артып, қоғамдық тұрақтылық нығаяды. Сондықтан заңды білу ғана емес, оны құрметтеу және талаптарын орындау – әрбір азаматтың міндеті.
Қорыта айтқанда, заң және тәртіп – қауіпсіз әрі әділетті қоғам құрудың берік негізі. Заңға құрмет әр адамның өзінен басталады. Әр азамат өз міндетін адал орындап, құқықтық нормаларды сақтаған жағдайда ғана қоғамда тұрақтылық, өзара құрмет пен жауапкершілік қалыптасады.
Ақмола гарнизоны әскери сотының бас маман-сот отырысының хатшысы А.Жәдігеров
[xfvalue_img]
