Сот қызметкердің құқығын қалпына келтірді

Нұр-Cұлтан қаласының Сарыарқа аудандық соты Н.-ның төленбеген жалақыны өндіріп алу және төленген айыппұлдар сомасын өндіріп алу туралы «М» жеке кәсіпкерге талап арызы бойынша азаматтық істі қарады.

Тараптар арасында еңбек шарты жасалған, соның шарттары бойынша талап қоюшы елорданың мейрамханаларының бірінде әкімші ретінде жұмыс істеген, жалақысы 180 000 теңгені құраған.

Жұмыстың бірінші айының аяқталуы бойынша талап қоюшыға жалақы төленбеген, осыған байланысты ол жұмыстан кетуді шешкен.

Сонымен қатар, жұмыс кезінде талап қоюшыға мекеменің әкімшісі ретінде тұрғын үй ғимаратында орналасқан ойын-сауық мекемесінің тыныштықты бұзғаны үшін оған 43 755 теңге айыппұл салынған.

Жауапкерден төленген әкімшілік айыппұл сомасын өндіріп алу туралы талап іс жүзінде оны төлеу бойынша міндетінен босатуға бағытталған, бұл әкімшілік жазаның мақсаттарына қайшы келеді.

Бұдан басқа, еңбек шартында қызметкер әкімшілік жауапкершілікке тартылған жағдайда, оларға төленген айыппұл регресс тәртібімен қызметкерден өндіріп алынатыны көзделмеген.

Соттың шешімімен талап ішінара қанағаттандырылды, талап қоюшының пайдасына жұмыс істеген кезеңі үшін төленбеген жалақы сомасы өндірілді.

Сот шешімі заңды күшіне енді.