Ақмола облысының жұртшылығы мектеп директорларының тест тапсыруын бақылауға алды

Білім беру жүйесінің сапасын арттыру және академиялық адалдықты қамтамасыз ету шеңберінде «Ustudy» Көкшетау қаласының өңірлік тестілеу орталығы аумақтық Сыбайлас жемқорлыққа қарсы іс-қимыл департаментінің қызметкерлерін және қоғам өкілдерін бақылаушы ретінде сыртқы емтихандарға тарту туралы бастама көтерді.

         Осы тұрғыда, 22 қыркүйекте өңірдің Сыбайлас жемқорлыққа қарсы іс-қимыл ведомствосының басшысы Мұрат Төлеубаев «Ақмола-адалдық алаңы» жобалық кеңсесінің басшысы Самира Тайтеновамен бірге өңірлік Тестілеу орталығында болып, оның қызметімен танысты.

         «Бұл бастама тестілеуді өткізу кезінде объективтілік пен ашықтық қағидаттарын қамтамасыз етуге, сондай-ақ әлеуетті сыбайлас жемқорлық тәуекелдерін болдырмауға ықпал етеді деп санаймыз. Мемлекет басшысы өз Жолдауында еліміздегі қоғамдық бақылау институтының рөлін арттыруға ерекше назар аударды. Бұл тұрғыда тестілеудің «тазалығын» Департамент мамандары ғана емес, өңірдегі қоғам белсенділері де қадағалайтынын атап өту қажет», - деді Мұрат Төлеубаев.

         Сондай-ақ, Орталық алаңында облыстың Сыбайлас жемқорлыққа қарсы қызметі, аумақтық Білім саласындағы бақылау департаменті, «Ustudy» өңірлік орталығы басшылығының, сондай-ақ қоғамшылдардың қатысуымен кездесу өтті. Онда Антикор мен білім беру ұйымдарының осы бағыттағы ынтымақтастығының негізгі мәселелері талқыланды.

         «Ustudy» өңірлік тестілеу орталығы – бұл «Ustudy» білім беру бренді мен Ұлттық тестілеу орталығы жүзеге асыратын жоба. Жоба шеңберінде өңірлік Тестілеу орталықтары бүкіл ел бойынша педагогтер, білім беру ұйымдарының басшылары, сондай-ақ оқушылары мен жоғары оқу орындарының студенттері үшін әртүрлі тесттер өткізеді.