Ақмола облысында 880 өзіне өзі қызмет көрсету бұрыштары жұмыс істейді

Бүгін Өңірлік коммуникациялар қызметі алаңында өткен брифинг барысында ҚР Мемлекеттік қызмет істері агенттігінің Ақмола облысы бойынша департаменті басшысының орынбасары Дархан Хайруллин мемлекеттік органдардың электронды түрде көрсететін қызметтерінің үлесі артқанын хабарлады.

Оның айтуынша, жыл басынан бері мемлекеттік қызметтердің 94% электронды түрде көрсетілген. Бұл көрсеткіш өткен жылы 83% құрағанын атап өткен жөн.

Сонымен қатар, халыққа көрсетілетін мемлекеттік қызметтердің жалпы санының артып келе жатқаны байқалады. Биылғы жылдың 9 айы ішінде 4 млн. 569 221 мемлекеттік қызмет көрсетілді.

Жұмыстың маңызды бағыты халықпен сапалы кері байланысты қамтамасыз ету болып табылады.

«Шағымдар санының тұрақты төмендеуі байқалады. Мысалы, егер 2018 жылы 60 шағым қаралса, 2019 жылы 39 өтініш келіп түсті. Осы жылы барлығы 25 шағым қаралды», - деп атап өтті Д.Хайруллин. Бұл үрдіс ең алдымен азаматтармен, сондай-ақ қызмет көрсетушілермен түсіндіру іс-шараларын жүргізуге байланысты.

Әкімдіктердің, білім беру, денсаулық сақтау ұйымдарының ғимараттарында және жалпыға қолжетімді басқа да орындарда 880 өзіне-өзі қызмет көрсету бұрыштары жұмыс істейді, онда еріктілер азаматтарды Egov.kz порталымен жұмыс істеу дағдыларына үйретеді. Барлық бұрыштар қажетті компьютерлік техникамен және перифериялық құрылғылармен жабдықталған.

Көкшетау қаласындағы жалпыға қолжетімді орындарында орналасқан бұрыштардың мекенжайларын 2GIS мобильді қосымшасынан табуға болады.

Халықтың әлеуметтік осал топтарына ерекше назар аударылады. Департамент «Шанс» қоғамдық қорымен бірлесіп, мүмкіндігі шектеулі адамдарды қызметтерді электронды түрде алу дағдыларына оқытты. Бұл бағыттағы жұмыс оларға уақыт және қаржы шығындарын азайтып, анықтамалар, куәліктер, рұқсат беру және басқа да қажетті құжаттар алуды жеңілдетуге әрі жылдамдатуға мүмкіндік берді.

Жазира Тоқтар, Мемлекеттік қызмет істері агенттігінің Ақмола облысы бойынша департаментінің баспасөз хатшысы