Алматыда өткен Форум барысында сыбайлас жемқорлыққа қарсы іс-қимылдың жаңа форматы ұсынылды

«Адалдық алаңы: сыбайлас жемқорлықтың алдын алу бойынша қоғам мен мемлекеттің өзара қарым-қатынасының жаңа форматы» республикалық форумында сарапшылар мен практиктер, мемлекеттік органдар мен үкіметтік емес ұйымдардың өкілдері сыбайлас жемқорлыққа қарсы іс-қимылдың тәсілдері мен тетіктерін талқылады.

Шараға Сыбайлас жемқорлыққа қарсы іс-қимыл агенттігінің Төрағасы Алик Шпекбаев, Алматы қаласының әкімі Бақытжан Сағынтаев, мемлекеттік органдардың, халықаралық және үкіметтік емес ұйымдардың өкілдері, құқық, сыбайлас жемқорлыққа қарсы іс-қимыл саласының мамандары қатысты.

Мемлекет пен қоғам арасындағы диалог алаңын кеңейту аясында Форум тұрғындардың түйткілді мәселелерін шешуге арналған ашық алаңға айналды.

Шараның мақсаты азаматтық қоғамның сыбайлас жемқорлыққа қарсы іс-қимылының біріккен тәсілдері мен түрлерін анықтау, сыбайлас жемқорлыққа қарсы іс-қимыл шараларының тиімділігін арттыру, жемқорлық тәуекелдері мен себеп-салдарын азайту, сыбайлас жемқорлыққа қарсы мәдениетті қалыптастыру және парасаттылық пен адалдықтың адамгершілік қасиеттерінің мәдениетін сіңіру.   

Форум аясында қатысушылар Алматы-Адалдық алаңы жобаларын енгізудің оң тәжірибесі бар нысандарға, бірқатар жоғары оқу орындарына барды, білім беру саласындағы жаңа жобалармен танысты, парасаттылық мектептері ашылды, қонақтар комплаенс-офицерлердің жұмысымен танысты.

Шара барысында Алик Шпекбаев: «Біз әлемдік тенденцияны ден қоя отырып, сенімге, әділдік пен парасаттылыққа негізделген сыбайлас жемқорлыққа қарсы іс-қимылдың өзіндік моделін жасадық. Мемлекеттік органдар мен қоғамның өзара қарым-қатынасының басты негіздерін нығайтуға ерекше назар аударамыз», - деп атап өтті.

Бүгін Сыбайлас жемқорлыққа қарсы қызмет жемқорлыққа қарсы іс-қимылда азаматтық қоғаммен өзара қарым-қатынастың «өсім нүктесін» күшейтуде.

Бұл үшін қатысудың қарапайым құралдары жасалған.

Алик Шпекбаев мәлімдегендей, барлық өңірлерде және бірқатар министрліктерде жұмыс істеп жатқан «Адалдық алаңы» жобалық кеңселері арқылы кез-келген адам сыбайлас жемқорлыққа қарсы шараларды әзірлеуге қатыса алады.

Қатысушылардың пікірінше, бүгінгі форум сыбайлас жемқорлыққа қарсы саясатты іске асыруға тың серпін беретін диалог алаңына айналады.