СІМ басшысы «ExxonMobil» компаниясының Қазақстандағы басқарушы директорымен кездесті

Сыртқы істер министрлігінде сыртқы саяси ведомствосының басшысы Бейбіт Атамқұловтың «ExxonMobil» компаниясының Қазақстандағы басқарушы директоры Динеш Сивасамбумен кездесуі өтті.

«Қазақстан саяси және экономикалық бағыттың сабақтастығын сақтап отыр, бұл жалпы бизнес қоғамдастығы үшін маңызды белгі. Біз «ExxonMobil» компаниясының әріптестік пен өзара тиімді ынтымақтастық рухына ұстануын, сондай-ақ Қазақстан экономикасын дамытуға қосқан үлесін жоғары бағалаймыз», - деді сыртқы саяси ведомствосының басшысы.

«ExxonMobil» өкілі өз қызметіндегі алдағы жоспарларымен бөлісіп, ҚР Үкіметі тарапынан инвесторларға көрсетіліп отырған қолдауын оң бағалады. «Инвестор ретінде біз Қазақстанмен ынтымақтастықты жалғастыруға мүдделіміз», - деді Д.Сивасамбу.

Кездесу барысында ынтымақтастықтың өзекті мәселелері мен перспективалық бағыттары, оның ішінде қайта өңдеу салаларын дамыту және индустрияландыру үшін компанияның инвестицияларын қайта пайдалану мәселесі талқыланды.

СІМ басшысы «ExxonMobil» түрлі салалардағы жаңа экономикалық жобаларға өз қаражатын қайта инвестициялау мүмкіндігін қарастыруға, сондай-ақ америкалық корпорацияның түрлі өнімдерін жеткізуге жұмыс атқаратын жаңа компаниялардың Қазақстанға келуіне ықпал етуге шақырды. Тараптар осы бағыттағы диалогты дамытуға келісті.

Сондай-ақ, «ExxonMobil» компаниясы еліміздің аумағында өндіріске, сондай-ақ әлеуметтік бағдарламаларға, атап айтқанда, компания жұмыс істейтін аймақтарда және жалпы Қазақстан бойынша денсаулық сақтау және білім беру салаларына одан әрі инвестициялауға мүдделі.

Сондай-ақ кездесу барысында Д.Сивасамбу «ExxonMobil» компаниясы басшылығының алдағы 32-ші Шетелдік инвесторлар кеңесінің отырысына қатысуын растады.

Анықтама: «ExxonMobil» елдегі алғашқы батыс инвесторларының бірі және бүгінгі таңда Қазақстанның бұл компаниямен ынтымақтастығына 26 жыл болды. Осы кезеңде Қазақстанға салынған инвестициялардың көлемі 22 млрд. АҚШ долларын құрады.

Қазақстан Республикасы Сыртқы істер министрлігінің

баспасөз қызметі