Астанада ҚР-дағы Адам құқықтары жөніндегі уәкілдің АҚШ істерінің уақытша сенімді өкілі Т.Лингпен кездесуі өтті

Астанада ҚР-дағы Адам құқықтары жөніндегі уәкіл Асқар Шәкіровтің АҚШ істерінің уақытша сенімді өкілі Теодор Лингпен кездесуі өтті.

Кездесу барысында А. Шәкіров американдық дипломатты Қазақстандағы адам құқықтарымен қалыптасқан жағдаймен, ұлттық құқық қорғау мекемесі жұмысының негізгі бағыттарымен, мемлекеттік органдармен, азаматтық сектор мен халықаралық ұйымдармен өзара әрекеттестікпен таныстырды.

Омбудсменнің орталық мемлекеттік органдардың атына өзекті құқық қорғау мәселелер жөнінде, атап айтқанда, мектеп пен мектепке дейінгі мекемелерде балалардың құқықтарын қамтамасыз ету, халықты кепілді медициналық көмек көрсету мен дәрі-дәрмекпен қамтамасыз ету, азаматтардың тұрғын үй құқықтарын іске асыруда заңсых әрекеттерді және заңнамадағы құқықтық коллизияларды жою, азаматтардың кепілдендірілген баспанасын банктердің өндіріп алу сот тәжірибесі, құқық қорғау органдарды реформалау жөнінде жолдаған бұқаралық үндеу хаттардың тәжірибесіне жеке назар аударылды.

Қазақстанда «омбудсмен +» үлгісі бойынша қызмет ететін және халықаралық сарапшылардың оң бағасына ие болған Азаптауды болдырмау бойынша ұлттық алдын алу тетігінің (ҰАТ) жұмысы айтарлықтай қызығушылықты тудырды.

Т. Линг азаматтардың құқықтарын қорғауды қамтамасыз етуде қолданылатын шаралардың маңыздылығын атап өтіп, қазақстандық құқық қорғау мекемесінің қызметіне оң бағасын берді.

Сондай-ақ ол АҚШ Елшілігі әрі қарай диалогты нығайтуға қызығушылығын білдіріп, құқық қорғау қызметіне қажетті ықпалдасуға әзір екенін айтты.

ҚР-дағы Адам құқықтары жөніндегі уәкіл аппаратының баспасөз қызметі