Қасым-Жомарт Тоқаев Республикалық қоғамдық штабқа барды

Қасым-Жомарт Тоқаев Қазақстан Республикасының Президенттігіне кандидат ретінде Республикалық қоғамдық штабқа (РҚШ) барып, үгіт-насихат және талдау орталықтарының, кандидаттың қоғамдық қабылдау бөлмесінің, медиа-штабтың, сенімді өкілдердің жұмысын үйлестіру орталығының,  байқаушылар штабының, жастар алаңының жұмысымен танысты.

Республикалық қоғамдық штабтың құрамына 474 адам енген. Олардың арасында Халықтық коалицияға біріккен ұйымдардың белгілі азаматтары, ғылыми-сарапшылық қауымдастық өкілдері, Парламент депутаттары, жастар және басқа да тұлғалар бар. Еліміздің әр өңірінде, оның ішінде қалалар мен аудандарда 226 штаб құрылып, 6 мыңнан астам адам қызмет етеді.

РҚШ мүшелері еліміздегі 200-ден астам елді мекенді аралап шығуды жоспарлап отыр. Республикалық және өңірлік штабтар 52 мыңнан аса іс-шара өткізбек.

Жалпы, үгіт-насихат жұмыстарына Халықтық коалицияның 7,5 мың белсендісі тартылды. Сондай-ақ 30 мың сенімді өкіл тіркеліп, сайлау күні барлық учаскелерде жұмыс істеу үшін 20 мыңға жуық бақылаушы дайындалды.

Республикалық және өңірлік қоғамдық штабтардың жұмысы туралы ақпаратты тыңдаған Қасым-Жомарт Тоқаев барлығына сенім артқаны үшін алғыс айтты.

Қасым-Жомарт Тоқаев өзінің «Әділетті Қазақстан: бәріміз және әрқайсымыз үшін. Қазір және әрдайым» атты сайлауалды бағдарламасын таныстырды.

Сайланған жағдайда Президент лауазымындағы жұмысында әділетті мемлекет, әділетті экономика, әділетті қоғам сынды үш негізгі қағидатты ұстануға ниетті:

Сөз соңында ол тарихи таңдау жасауға шақырды.

– Бәріміз халық алдында жауаптымыз. Бұл – біздің бірегей мүмкіндігіміз. Түбегейлі өзгерістер мен батыл шешімдер қабылдайтын уақыт жетті. Енді басқа мүмкіндік болмайды. Біз елімізді дамытудың және ілгерілетудің даңғыл жолына шығарып, Әділетті Қазақстанды құруға міндеттіміз, – деді Қасым-Жомарт Тоқаев.